Ushbu hujjat — "Bronla" mas’uliyati cheklangan jamiyati (keyingi o‘rinlarda — "Bronla" yoki "Platforma") tomonidan jismoniy va yuridik shaxslarga (keyingi o‘rinlarda — "Foydalanuvchi") bildirilgan rasmiy ommaviy taklif (oferta) hisoblanadi. O‘zbekiston Respublikasi Fuqarolik kodeksining 367 va 369-moddalariga muvofiq, Foydalanuvchi tomonidan quyidagi shartlarning so‘zsiz qabul qilinishi (aksept) ushbu Shartnomani tuzilgan deb hisoblash uchun asos bo‘ladi.

Foydalanuvchi Platformadan foydalanishni boshlashdan, ro‘yxatdan o‘tishdan yoki bron qilishdan oldin ushbu Shartnoma shartlari bilan to‘liq tanishib chiqishi shart. Platformadan foydalanish Foydalanuvchining barcha shartlarni o‘qigani, tushungani va to‘liq qabul qilganini anglatadi.

1. Atamalar va ta’riflar

  1. Platforma (Bronla.uz) — Bronla’ga tegishli bo‘lgan, dacha va dam olish maskanlari egalari (Ijara beruvchilar) hamda ularni ijaraga olmoqchi bo‘lgan shaxslar (Foydalanuvchilar) o‘rtasida onlayn bog‘lovchi vazifasini bajaruvchi axborot-vositachilik tizimi (veb-sayt va mobil ilova).
  2. Ijara beruvchi — Platformada obyekt (dacha, rezort, dam olish maskani) joylashtirgan va uni vaqtinchalik foydalanishga beruvchi mulkdor yoki vakolatli shaxs. Ijara beruvchi Bronla’ning xodimi yoki vakili emas.
  3. Obyekt — Platformada e’lon qilingan va ijaraga beriladigan dacha, rezort yoki boshqa dam olish maskani.
  4. Bron — Foydalanuvchi tomonidan Obyektni ma’lum sanaga band qilish.
  5. Ijara haqi — Obyektdan foydalanish uchun Ijara beruvchiga to‘lanadigan to‘liq summa.
  6. Avans (oldindan to'lov) / Xizmat haqi — Mijoz tomonidan bron qilishda Bronla'ga to'lanadigan, ijara umumiy narxining 15% ini tashkil etuvchi summa. Ushbu summa ijara umumiy narxining oldindan to'lanadigan qismi bo'lib, ayni vaqtda Bronla'ning bron (bandlov) xizmati haqiga to'g'ri keladi. U bron Ijaraga beruvchi tomonidan tasdiqlangach, ko'rsatilgan xizmat evaziga olingan hisoblanadi va faqat ushbu Ofertaning "Bronni bekor qilish va pul qaytarish" bo'limida belgilangan shartlarga muvofiq qaytariladi.
  7. Obyekt haqi — Ijara haqining qolgan 85% (sakson besh foiz) qismi bo‘lib, Foydalanuvchi tomonidan to‘g‘ridan-to‘g‘ri Ijara beruvchiga, Obyektga kirish vaqtida to‘lanadi.
  8. Kirish sanasi — Foydalanuvchining bron qilingan Obyektga kirish huquqi boshlanadigan sana.

2. Shartnomaning predmeti va Bronla’ning maqomi

  1. Bronla Foydalanuvchiga faqat onlayn bron qilish (vositachilik) xizmatini ko‘rsatadi: Obyektlar haqida ma’lumot taqdim etadi, bron rasmiylashtirish va Xizmat haqini onlayn qabul qilish imkonini beradi.
  2. Bron qilingan Obyektni ijaraga berish bo‘yicha munosabatlar bevosita Foydalanuvchi va Ijara beruvchi o‘rtasida yuzaga keladi. Bronla ijara shartnomasining tarafi emas.
  3. Bronla Obyektlarning egasi, ijarachisi yoki operatori emas. Bronla Obyektlarni shaxsan ko‘zdan kechirmaydi, ularni boshqarmaydi va ularning holatini nazorat qilmaydi.
  4. Bronla Obyektning sifati, holati, xavfsizligi, e’londa ko‘rsatilgan ma’lumotlarning to‘liq aniqligi, shuningdek Foydalanuvchi va Ijara beruvchi o‘rtasidagi munosabatlar uchun javobgar emas.

3. Ro‘yxatdan o‘tish

  1. Platformadan to‘liq foydalanish uchun Foydalanuvchi ro‘yxatdan o‘tishi va haqiqiy ma’lumotlar (telefon raqami, elektron pochta va h.k.) taqdim etishi shart.
  2. Foydalanuvchi 18 (o‘n sakkiz) yoshga to‘lgan, muomalaga layoqatli shaxs bo‘lishi kerak. Voyaga yetmaganlar Platformadan faqat qonuniy vakili roziligi bilan foydalanishi mumkin.
  3. Bronla taqdim etilgan ma’lumotlarni tasdiqlashni so‘rash, noto‘g‘ri yoki yolg‘on ma’lumot aniqlangan holda hisobni bloklash huquqiga ega.
  4. Foydalanuvchi o‘z hisobi maxfiyligi va undan amalga oshirilgan barcha harakatlar uchun javobgar bo‘ladi.

4. Shaxsiy ma’lumotlarni qayta ishlash

  1. Ro‘yxatdan o‘tish orqali Foydalanuvchi o‘z shaxsiy ma’lumotlarini O‘zbekiston Respublikasining “Shaxsga doir ma’lumotlar to‘g‘risida”gi qonuniga muvofiq qayta ishlashga rozilik beradi.
  2. Ma’lumotlar faqat xizmat ko‘rsatish, bronni rasmiylashtirish, Ijara beruvchi bilan bog‘lash va xizmat sifatini yaxshilash maqsadida ishlatiladi.
  3. Bron rasmiylashtirilganda Foydalanuvchining bron uchun zarur ma’lumotlari (ism, telefon raqami va h.k.) Ijara beruvchiga taqdim etilishiga Foydalanuvchi rozilik beradi.
  4. Foydalanuvchi o‘z ma’lumotlarini o‘zgartirish yoki o‘chirishni so‘rashi mumkin; bunda Platformaning ayrim funksiyalaridan foydalanish cheklanishi mumkin.

5. Bron qilish va to‘lov tartibi

  1. Foydalanuvchi tanlangan Obyektni bron qilib, Xizmat haqini (Ijara haqining 15%) onlayn to‘laydi.
  2. Bron Ijara beruvchi tomonidan tasdiqlangandan so‘ng kuchga kiradi va Bronla’ning bron qilish xizmati shu paytda to‘liq ko‘rsatilgan hisoblanadi.
  3. Ijara haqining qolgan 85% qismini (Obyekt haqi) Foydalanuvchi to‘g‘ridan-to‘g‘ri Ijara beruvchiga, Obyektga kirish vaqtida to‘laydi. Bronla bu to‘lovning tarafi emas va uni qabul qilmaydi.
  4. To‘lov Payme, Click, Paynet tizimlari orqali amalga oshiriladi. Naqd to‘lovlar Paynet shahobchalari orqali qabul qilinadi.
  5. Foydalanuvchi to‘lov tizimlari tomonidan olinadigan komissiyalar uchun mas’ul bo‘ladi.

6. Bekor qilish va Xizmat haqini qaytarish shartlari

  1. Xizmat haqi Bronla’ning ko‘rsatgan vositachilik xizmati uchun olinadi. Xizmat ko‘rsatilgandan (bron tasdiqlangandan) so‘ng Xizmat haqi quyidagi shartlarga muvofiq qaytariladi:

Bron bekor qilingan vaqt

Qaytariladigan Avans/Xizmat haqi

Kirish sanasidan 7+ kun oldin bekor qilinsa

Avans/Xizmat xaqi summasining 33% (umumiy ijara summasining 5%) qaytariladi.

Kirish sanasidan 1–6 kun oldin bekor qilinsa

Avans/Xizmat xaqi summasi qaytarilmaydi.

Kirish sanasiga 24 soatdan kam vaqt qolganda bekor qilinsa yoki obyektga mijoz kelmasa

Avans/Xizmat xaqi summasi qaytarilmaydi. Mijoz qolgan 85% to‘lovni to‘liq amalga oshirishi shart.
  1. Agar tasdiqlangan bron Ijara beruvchi tomonidan bekor qilinsa, Foydalanuvchiga muqobil Obyekt taklif qilinadi. Foydalanuvchi taklifni qabul qilmasa, Xizmat haqi to‘liq qaytariladi.
  2. Xizmat haqini qaytarish, agar asos bo‘lsa, to‘lov amalga oshirilgan usul orqali, ariza ko‘rib chiqilgandan so‘ng 3 (uch) ish kuni ichida bajariladi.
  3. Obyekt haqi (85%) Foydalanuvchi va Ijara beruvchi o‘rtasidagi munosabat bo‘lib, uni qaytarish masalasi to‘g‘ridan-to‘g‘ri Ijara beruvchi bilan hal qilinadi. Bronla bu summaning qaytarilishi uchun javobgar emas.

7. Obyekt holati va da’volar tartibi

  1. Platformada joylashtirilgan fotosurat va videolar Obyekt haqida umumiy tasavvur berish maqsadida taqdim etiladi. Yoritish, suratga olish burchagi, mavsumiy o‘zgarishlar, mebel joylashuvi yoki bezaklardagi kichik farqlar bron qilingan xizmatdan voz kechish yoki to‘lovni qaytarish uchun asos bo‘la olmaydi.
  2. Foydalanuvchi Obyektga kirgan zahoti, undan foydalanishni boshlashdan (joylashishdan, narsalarni ochib qo‘yishdan, qulayliklardan foydalanishdan) AVVAL Obyekt holatini ko‘zdan kechirishi shart.
  3. Obyekt holati e’londagi ma’lumotga jiddiy mos kelmagan taqdirda, Foydalanuvchi bu haqda Obyektga kirgandan so‘ng 1 (bir) soat ichida quyidagi tartibda xabar berishi shart:
    • Platforma yoki @bronlahelp orqali yozma murojaat qilish;
    • nomuvofiqlikni tasdiqlovchi foto va/yoki videolarni biriktirish;
    • ayni vaqtda Ijara beruvchini ham xabardor qilish.
  4. Agar Foydalanuvchi yuqorida ko‘rsatilgan tartib va muddatlarga rioya qilmasdan Obyektdan foydalanishni boshlasa (jumladan, unda tunab qolsa yoki qulayliklardan foydalansa), bu Obyekt holatini to‘liq qabul qilgani va uning holati bo‘yicha keyingi da’volardan voz kechgani deb hisoblanadi.
  5. Obyektda biroz vaqt dam olib, dam olish yakunlangach yoki Obyektdan chiqib ketgandan keyin bildirilgan da’volar, shuningdek voqea joyida real vaqtda tasdiqlanmagan da’volar ko‘rib chiqilmaydi va to‘lovni qaytarish uchun asos bo‘lmaydi.
  6. Obyekt holati bo‘yicha asosli da’vo yuzaga kelganda ham, Xizmat haqi (15%) Bronla’ning allaqachon ko‘rsatilgan vositachilik xizmati uchun olingani sababli, asosan qaytarilmaydi. Obyektning holati va sifati uchun javobgarlik Ijara beruvchiga yuklatiladi va bu masala Foydalanuvchi bilan Ijara beruvchi o‘rtasida hal qilinadi.

8. Xavfsizlik, video kuzatuv va shaxsiy hayot daxlsizligi

  1. Obyektdagi xavfsizlik tizimlari, jumladan video kuzatuv (kamera) qurilmalari uchun to‘liq javobgarlik Ijara beruvchiga yuklatiladi. Bronla bunday qurilmalarni o‘rnatmaydi, boshqarmaydi va nazorat qilmaydi.
  2. Foydalanuvchi va Ijara beruvchi o‘rtasida kuzatuv qurilmalari yuzasidan kelib chiqishi mumkin bo‘lgan har qanday nizo bevosita ana shu ikki taraf o‘rtasidagi munosabat hisoblanadi. Bronla bunday nizoning tarafi emas va Ijara beruvchining xatti-harakatlari uchun javobgar emas.
  3. Bronla Ijara beruvchining qonunbuzarligi natijasida Foydalanuvchiga yetkazilgan zarar uchun javobgar bo‘lmaydi; biroq Bronla nizoni hal qilishda axborot taqdim etish va vositachilik qilish orqali ko‘maklashishi mumkin.

9. Foydalanuvchining huquq va majburiyatlari

  1. Foydalanuvchi huquqlari:
    • Platformadan Shartnoma shartlariga muvofiq foydalanish;
    • Obyektlar haqida e’londa berilgan ma’lumotlarni olish;
    • nizo yuzaga kelganda belgilangan tartibda murojaat qilish.
  2. Foydalanuvchi quyidagilarni bajarishi shart:
    • ro‘yxatdan o‘tishda haqiqiy ma’lumot berish;
    • Obyektdan ehtiyotkorlik bilan, belgilangan mehmonlar soni va qoidalariga muvofiq foydalanish;
    • Obyektga yoki Ijara beruvchining mol-mulkiga yetkazilgan zararni Ijara beruvchi bilan kelishilgan tartibda qoplash;
    • jamoat tartibiga rioya qilish, qo‘shni va atrofdagilarga noqulaylik tug‘dirmaslik.
  3. Foydalanuvchiga quyidagilar taqiqlanadi:
    • dublikat (soxta) hisoblar yaratish;
    • boshqa shaxslarni chalg‘itish yoki yolg‘on ma’lumot tarqatish;
    • zararli dasturlar yuklash yoki Platforma ishiga xalal berish;
    • avtomatlashtirilgan tizimlar (bot, parser) yordamida ma’lumot to‘plash;
    • Obyektni kelishilgandan boshqa maqsadda (masalan, ruxsatsiz tadbirlar) ishlatish.

10. Bronla’ning huquq va majburiyatlari

  1. Bronla bron qilish xizmatini ko‘rsatish uchun texnik imkoniyat (Platforma) taqdim etadi.
  2. Bronla Platforma ishini, e’lonlar mazmunini va foydalanish qoidalarini istalgan vaqtda yangilash hamda o‘zgartirish huquqiga ega.
  3. Bronla shartlarni buzgan, soxta ma’lumot bergan yoki boshqalarga zarar yetkazgan Foydalanuvchining hisobini bloklash huquqiga ega.
  4. Bronla Obyektlarning holati, xavfsizligi, Ijara beruvchining xatti-harakatlari va taraflar o‘rtasidagi ijara munosabatlari uchun javobgar emas.

11. Kafolatlar va javobgarlikni cheklash

  1. Obyektlar Ijara beruvchi tomonidan “qanday bo‘lsa, shundayligicha” taqdim etiladi. Bronla Obyektning muayyan kutilgan natijaga, sifatga yoki maqsadga muvofiqligini kafolatlamaydi.
  2. Bronla quyidagilar uchun javobgar emas:
    • Obyektning haqiqiy holati, tozaligi, xavfsizligi yoki e’londagi tavsifga mos kelmasligi;
    • Ijara beruvchining harakat yoki harakatsizligi, jumladan video kuzatuv bilan bog‘liq holatlar;
    • Foydalanuvchiga yoki uning mol-mulkiga Obyektda yetkazilgan zarar, jarohat yoki yo‘qotishlar;
    • Foydalanuvchi va Ijara beruvchi o‘rtasidagi nizolar va o‘zaro hisob-kitoblar;
    • uchinchi shaxslar (to‘lov tizimlari, aloqa operatorlari) tomonidan yuzaga kelgan uzilishlar.
  3. Bronla’ning har qanday holatdagi javobgarligi, qonunda imperativ belgilanmagan darajada, tegishli bron bo‘yicha Foydalanuvchi to‘lagan Xizmat haqi miqdoridan oshmaydi.
  4. Bronla bilvosita, tasodifiy yoki natijaviy zararlar (boy berilgan foyda, ma’naviy zarar va h.k.) uchun javobgar bo‘lmaydi.

12. Zararni qoplash (tovon)

  1. Foydalanuvchi o‘zining Shartnomani buzishi, Obyektdan noqonuniy yoki noto‘g‘ri foydalanishi natijasida uchinchi shaxslar yoki Ijara beruvchi tomonidan Bronla’ga qo‘yilgan da’volar bo‘yicha Bronla’ni zarardan himoya qilishi va yetkazilgan zararni qoplashi shart.

13. Fors-major holatlari

  1. Taraflar o‘zlariga bog‘liq bo‘lmagan favqulodda holatlar (tabiiy ofatlar, epidemiya, davlat organlari qarorlari, elektr yoki internet uzilishi va h.k.) tufayli majburiyatlarni bajarmaganligi uchun javobgar bo‘lmaydi.

14. To‘lov nizolari

  1. Foydalanuvchi asossiz ravishda to‘lovni qaytarib olish (chargeback) tashabbusi bilan murojaat qilsa va bron Shartnomaga muvofiq amalga oshirilgan bo‘lsa, Bronla o‘z huquqlarini qonuniy yo‘llar bilan himoya qilish huquqini saqlab qoladi.

15. Intellektual mulk

  1. Platforma, uning dizayni, logotipi, dasturiy ta’minoti va mazmuniga bo‘lgan barcha huquqlar Bronla’ga tegishli. Ulardan Bronla’ning yozma ruxsatisiz foydalanish taqiqlanadi.

16. Nizolarni hal qilish

  1. Nizoli vaziyat yuzaga kelganda, taraf mijozlar bilan ishlash bo‘limiga yozma murojaat qilishi mumkin (Telegram: @bronlahelp).
  2. Bronla murojaatni 3 (uch) ish kuni davomida ko‘rib chiqadi.
  3. Nizolar taqdim etilgan dalillar (foto, video, yozishmalar) asosida ko‘rib chiqiladi. Voqea joyida va o‘z vaqtida taqdim etilmagan dalillar asosida bildirilgan shikoyatlar asossiz deb topilishi mumkin.
  4. Bronla tomonidan taklif qilingan yechim sudgacha (kelishuv) tartibida hal qilishga qaratilgan bo‘lib, tomonlar uchun yakuniy emas. Kelishuvga erishilmagan taqdirda, nizo O‘zbekiston Respublikasi qonunchiligiga muvofiq tegishli sud tartibida hal qilinadi.

17. Yakuniy qoidalar

  1. Ushbu Shartnoma Foydalanuvchi Platformadan foydalanishni boshlagan paytdan kuchga kiradi va u tizimdan foydalangan butun davr mobaynida amal qiladi.
  2. Bronla Shartnoma shartlarini istalgan vaqtda o‘zgartirish huquqiga ega bo‘lib, yangilangan tahririni Platformada e’lon qiladi. Foydalanuvchining xizmatdan foydalanishni davom ettirishi o‘zgarishlarga rozilik hisoblanadi.
  3. Foydalanuvchi shaxsiy kabinetdan chiqib, Platformadan foydalanishni to‘xtatish orqali Shartnomani bekor qilish huquqiga ega. Bunda allaqachon ko‘rsatilgan xizmatlar uchun to‘langan summalar qaytarilmaydi.
  4. Shartnomaning biror bandi qonunga zid deb topilsa, bu boshqa bandlarning amal qilishiga ta’sir qilmaydi.
  5. Ushbu Shartnomaga O‘zbekiston Respublikasi qonunchiligi qo‘llaniladi.

18. Rekvizitlar va aloqa

"Bronla" MChJ

STIR (INN): 307027814

Aloqa: Telegram @bronlahelp | E-pochta: mail@bronla.uz | Tel: +998785551991

Manzil: Toshkent shahri, Yakkasaroy tumani, Mirobod ko'chasi, 10-uy.

Oxirgi tahrir sanasi: 24.06.2026